مسألة التلازم بالعامية

[سؤال عبر الآسك]

ممكن يا شيخ توضح لنا مسألة اللازم والمآل -بكلام مبسط-

الجواب:

هناك قضيتان:

قضية المآل + قضية التلازم:

كلتا القضيتان متقاربتان جدا وأغلب التفريق إنما هو لغوي مهمل في الاستعمال.

 

يعني المآل والتلازم بنفس الاستعمال, يعني مفيش فرق تقريبا.

كل القصة إنهم بيعرفوا اللازم بالنتيجة الضرورية اللي مينفعش تتفك عن الملزوم .. يعني ايه؟

تعال نعرف يعني ايه تلازم أصلا:

التلازم يامولانا يعني نشوء شيء عن شيء .. يعني ايه برضه؟

يعني حاجة بتحصل بسبب حاجة بس لازم تحصل .. ضروري تحصل ولو محصلتش يبقى ده مسموش لازم.

ده طبعا في اللغة ! [هنتكلم في الشرع وكان لازم أقولك قصة اللغة عشان فيه ناس بتدلس وتستخدم المعنى اللغوي بس ]

المآل بقى بيقولوا ينفع ينفك .. رغم أن تعريفه هو ما يصير إليه الشيء يعني الآثار المترتبة على الشيء.

حسيت بفرق ؟ !

سيبك من اللي فات ..

يعني ايه تلازم ؟

يعني عندنا ثلاث حاجات:

1- ملزوم  ... 2- علاقة  ... 3- لازم.

الملزوم: هو الشيء الأصلي اللي لما بسببه بيحصل اللازم.

يعني ايه؟

يعني السبب في وجود النتيجة أو المحصلة هو الملزوم ده ..

يعني لو أشعلت شمعة سيضيء ما حولها ..

عندنا ثلاث أكران.

الإشعال: هو السبب أو العلة .. اللي لو حصلت هيحصل حاجة .. وده اسمه الملزوم.

الإضاءة: هو النتيجة اللي حصلت أو متوقع إنها تحصل لما نشعل الشمعة وده اسمه اللازم.

فيه حاجة بقى اللي هي العلاقة بين الإشعال والإضاءة اللي ترتب شيء على شيء .. دي بقى اسمها عملية التلازم, وتقدر تقول هي هي عملية المآل.

الكلام ده كله مفهوم .. ايه المشكلة عند الفقهاء؟

مفيش مشكلة كل القصة انهم بيقولوا: [طبعا الفقهاء دلوقتي هيتكلموا على اساس اني اللي سامعهم فاهم الكلمتنين اللي فوق دول]

بيقولوا: انتو عارفين إن هناك فرق بين اللازم والملزوم وان اللازم لا يمكن يكون هو الملزوم ..

يعني الاشتعال مش هو الضوء, يعني لو الاشتعال هو الضوء هنشعل ليه ؟

يعني النار مش هي الحرارة .. الحرارة بتحصل بعد النار.

يعني المطر مش هو بلل التربة.

ايوه عايزين يقولوا ايه يعني؟

هما بيقولوا : انت من حقك تعمل حساب وتاخد بالك من اللازم وتخاف جدا وتحترس والجماعة الأصوليون عاملين مبحث شديد في أبواب [مقاصد الشريعة] وبيتكلموا في مسائل [شوف أي بحث بيتكلم عن مآلات الأفعال وهتلاقي كتير عالشبكة أو ذاكره في الموافقات باب الاجتهاد لو ليك طاقة وفيه أخ اختصر القصة دي في كتاب اسمه نظرية المقاصد عند الشاطبي الاتنين في الشاملة مش هتتعب, ولو عايز توفر المسائل دي هتلاقيها في اعتبارات كتير سد الذريعة والاستحسان واعتبار الضرورة والخلاف ] .. المهم من حقك تخاف من المآل وتعمله اعتبار وتحذر وتحترس بس .......

بس مينفعش ابدا تقول إن الملزوم هو اللازم, إلا في حالة وحدة متفق عليها ؟ ايه هي؟

إن اللازم ده يقع .. [طبعا في الحالة دي مش هيبقى حكم باللازم, فيه خلاف في الباقي]  يعني ايه .. يعني لما الأشاعرة يقولوا : الرحمن على العرش استوى, أي استولى.

مش المفروض ده كفر؟

قالك: لا .. هو مآله للكفر .. لأنهم أولوا وحرفوا اللفظ وقالوا استولى وبعضهم قال: لا نعرف المعنى.

لكن الحقيقة مآل الكلام ده .. تكذيب كلام الله لأن مفيش حاجة اسمها استوى بمعنى استولى والأخطل النصراني مش حجة, ومفيش حاجة اسمها منعرفش المعنى,, وربنا قال: {بلسان عربي مبين}, بس برضه محدش كفرهم لأن مآلهم للتكذيب لا أن قولهم كفر بذاته.

طيب ايه المشكلة لما نقول مآله إلى الكفر ونحذر تحذيرا شديدا ؟ مفيش اشكال خالص.

بس منقولش ده كفر.

طيب لو قلنا على اللازم كفر ايه المشكلة؟

المشكلة: إننا كده هنتشبه بالخوارج ليه؟

لأن الملزوم [اللي هو السبب] مش كفر .. فلو حكمنا عليه وهو مش كفر بأنه كفر من غير ما يقع اللازم  [اللي هو النتيجة وهي كفر] .. يبقى كده بنقول على المفسق كفر يعني الكبيرة مثلا كفر .. لأن الكفر موقعش !

هل التلازم ده ليه علاقة بالعوارض الأهلية يعني زي الجهل والتأويل وكده ؟

طبعا ليه زي أي مسألة بس المشكلة دلوقت ملهاش علاقة بالإعذار في الكفر .. لأن الملزوم لسه موصلش للكفر فمش مشكلتنا دلوقت الإعذار.

طبعا فيه مسائل تانية متعلقة بالتلازم زي علاقة اللازم بالملزوم هل هي علاقة واضحة فعلا ولا مش واضحة هل عليها دليل ولا لا ؟

لأن أحيانا بيكون التلازم ده مش حقيقي وانه مجرد وهم ومفيش دليل عليه غير الاحتمال والاحتمال لا يستدل به إلا أن يترجح.

كتبت بالعامية للتسهيل رغم أن هذا مصاب في جناب هذا الباب, وأرجو أن يكون السائل بعد هذه المشقة مصريا !

ــــ

والله أعلم

مقال لأخي أبي مارية التميمي استفد خصوصا من التعليقات ولو المصطلحات فقط حتى وإن خالفته:https://www.facebook.com/abumariaatmimi9/posts/1433892286935346?pnref=story

مقال أرسله أحد الإخوة, طويل نوعا ما لكن ضرب أمثلة للتقريب جولة في مشاهد التلازم بين العقل والنقل :http://justpaste.it/m2am
أبو صهيب الحنبلي

تصنيف :